vaqueiras

VIDA

Raembautz de Vaqueiras si fo fillz d'un paubre cavaillier de Proensa, del castel de Vaqueiras, que avia nom Peirors, qu'era tengutz per mat.
En Raembautz si se fetz joglar et estet longua saison ab lo prince d'Aurenga, Guillem del Baus. Ben sabia chantar e far coblas e sirventes; e•l princes d'Aurenga li fetz gran ben e gran honor, e l'ennanset e•l fetz conoisser e presiar a la bons gen.
E vent s'en en Monferat, a miser lo marques Bonifaci. Et estet en sa cort lonc temps. E crec si de sen e d'armas e de trobar.
Et enamoret se de la serror del marques, que avia nom ma dompna Biatritz, que fo moiller d'Enric del Caret. E trobava de leis mantas bonas cansos.
Et apellava la en sas cansos "Bels Cavalliers". E fon crezut qu'ella li volgues gran ben per amor.
E quant lo marques passet en Romania, el lo mena ab se e fetz lo cavalier. E det li gran terra e gran renda el regisme de Salonic. E lai el mori.