|
Darriera flor |
|
|
Darriera flor |
L'arèndola m'a cantat la cançon dei país rimatats E siéu partit mièj'ora Istòria de promenar un pauc à l'entorn de la tèrra Istòria de vèire un pauc la tèsta que an De l’autre costat dau ròdol Vacas giboas Tartugassas Se lo blu de la mar mi parla de tu Segur alora li mieus pens plan plan monteran mai Sus lo camin grand Mai que d'un còup l'avèm montat per rire Aüra siam aquí à si regarjar en plorant Veitura darrier veitura La negra davant L'arèndola m'a cantat la cançon dei país sensa tèsta E siéu aquí plen de laissemi 'star Se la nuèch non cala aganterai li parpalhons Damont subre la Valièra Dont subla lo vent tra lei pinhas La música dei petoás negant la coala Se lei cabras tórnon mai plus encuèi M’en vau móser la pèl dei olivas Mandar una mordanha dins la certituda L'arèndola m'a cantat la cançon dei país sensa nuèch E siéu partit lo coar malaut Sus de camins grands de tèrra Se lo blu de la mar mi parla de tu Creperai deman mé li parpalhons vèrds e negres Lo vent subre la Valièra E aquela cançon que non s’en val de s'estofar Sabi plus Sabi plus Sabi plus la color de la flor Sabi plus Sabi plus lo gust de l'aiga clara Sabi plus lo silenci Sabi plus lo nom dei jorns Sabi manco plus caminar Siéu solet aquí, Solet coma aquel aucèl perdut Clavelat per lo frèi de novembre Solet coma un pairòl traucat Eraviam bordos e fasiem d'estranhessas per carrrieras Siam partits en lei coalas darrier li muus En li camps gèrps si siam picats en tèrra Davant lei lèbres que petàvon de rire Lo vent bofava sus la plana À la cala ai cerièias i eravam totjorn un molon Èra pròpi bèl una flor Fa venir lo rire Dona boan gust à l'ària Venètz mé ieu per li camins Venètz Lo solelh si leverà deman sus un jorn sensa vergonha Venètz La pluèia n'ajuderà Lo vent n'apontelerà Per una istòria audida e lo cant de l'aucèl sus lo fenestron Per la vida que n'estirassa e li amics que son mòrts Vòli cridar encara un còup esto sera Lo ponh dins lo solelh Òme develhe-ti Es encara temps
Alan PELHON, Coma una música, Z’Editions, 1989. |