Prouvençau, veici la coupo
Que nous vèn di Catalan:
A-de-rèng beguen en troupo
Lou vin pur de noste plant!

Coupo santo
E versanto,
Vuejo à plen bord,
Vuejo abord
Lis estrambord
E l'enavans di fort!

D'un vièi pople fièr e libre
Sian bessai la finicioun;
E, se toumbon li Felibre,
Toumbara nosto nacioun.
Coupo santo, etc. 

D'uno raço que regrèio
Sian bessai li proumié gréu;
Sian bessai de la patrio
Li cepoun emai li priéu.
Coupo santo, etc.

Vuejo-nous lis esperanço
E li raive dóu jouvent,
Dóu passat la remembranço
E la fe dins l'an que vèn.
Coupo santo, etc.

Vuejo-nous la couneissenço
Dóu verai emai dóu Bèu,
E lis àuti jouïssènço
Que se trufon dóu toumbèu.
Coupo santo, etc.

Vuejo-nous la Pouësio
Per canta tout ço que viéu,
Car es elo l'ambrousio
Que tremudo l’ome en diéu.
Coupo santo, etc.

Per la glòri dóu terraire
Vautre enfin que sias counsent,
Catalan, de liuen, o fraire,
Coumunien tóutis ensen !
Coupo santo, etc.

Frederi MISTRAU, AVOUST 1867.
 

Provençaus, veicí la copa
Que nos vèn di Catalans:
À-de-rèng beguèm en tropa
Lo vin pur de nòste plant!

Copa santa
E versanta,
Vueja à plens bòrds,
Vueja abòrd
Lis estrambòrds
E l'enavant di fòrts!

D'un vièlh pòple fièr e libre
Siam bessai la finicion;
E, se tómbon li Felibres,
Tombarà nòsta nacion.
Copa santa, etc. 

D'una raça que regrelha
Siam bessai li promiers greus;
Siam bessai de la patria
Li cepons emai li prieus.
Copa santa, etc.

Vueja-nos lis esperanças
E li raives dau jovent,
Dau passat la remembrança
E la fe dins l'an que vèn.
Copa santa, etc.

Vueja-nos la coneissença
Dau verai emai dau Beu,
E lis auti joïssenças
Que se trúfon dau tombeu.
Copa santa, etc.

Vueja-nos la Poesia
Per cantar tot çò que viu,
Car es ela l'ambrosia
Que tremuda l’òme en dieu.
Copa santa, etc.

Per la glòria dau terraire
Vautres enfin que siatz consents,
Catalans, de luènh, ò fraires,
Comunièm totis ensèms !
Copa santa, etc.

Frederic MISTRAU, AVOST 1867.