* Dins leis arenas de Peròls, pròche Montpelhier, un nenon de cinc ans s'emmasca un pauc e demanda à son papet : “Papet, papet ! Diga, lo que sortís dins l'arena, es un buòu ò una vaca?” 
“Chch !” Li respond lo papet.
E lo pichòt torna pausar sa question, un còp, dos còps... Alora lo papet li respond :
“Es un buòu o veses pas? Es un papà, a de banas, coma tótei lei papàs !”
Sabe pas se lo pichòt a tot comprés !

* À la fin de la corsa au Grau dau Rèi per la fèsta d'estiu, lo temps es fòrça mascarat. Lo monde espèron la bandida que farà sortir lei buòus de l'arena entre sei gardians. E òm espèra e òm espèra... Talament que dos vièlhs que son aquí romégon e un ditz à l'autre: “E ben ! s'esperam un pauc mai, crese qu'aurèm una polida abrivada de cagaraulas, que vai plòure!”

* Dins un corsa de buòus joves ambé de rasetaires estatjants, un vièlh crida: “Prèn-lo de fàcia aqueu buòu !”
Lo viraire, qu'ajuda lei rasetaires, de respòndre :
“E tu, una femna quand es en colèra la prènes de fàcia ?”

* Ais Aigas Mòrtas dau temps de la fèsta, à la corsa dins lo plan montat davant lei barris, un torista “ponchejaire” passa davant la vaca. L'animator, au micrò, li ditz :
“Mèfi, grandet, que vas leu vèire lei barris à l'envèrs !”

* À Marsilhargas siéu drecha darrier lei travetas (barras de fèrre lòng la còntra pista de l'arena). À senestra, un tipe, pas tròp fin, charra de lònga per dire de colhonitges. Au tresen buòu càmbia de plaça. Mon amiga me fai :
“Avètz perdut vòstre intellectuau de gaucha ?”